Nýtt sérfræðifag fyrir bragðlauka
Nói Síríus auglýsir eftir áhugasömum aðilum til að taka þátt í mótun á íslenskri sælgætissögu á gigg-markaðstorginu Giggó. Starfið flokkast undir sérfræðiþjónustu; nammismakkari.
Samkvæmt Önnu Fríðu Gísladóttir, framkvæmdastjóra markaðssviðs hjá Nóa Siríus er vöruþróun mikilvægur hluti af vörumerki Nóa Síríus og nýjungar frá þeim megi finna reglulega í hillum verslana.
Mikilvægt er að framkvæma prófanir á nýjungum og smakka þær sömuleiðis til að ganga úr skugga um að varan sé vænleg til vinnings, bæði í huga og munni neytenda.
„Á vinnustofu kom upp sú hugmynd að auglýsa þetta sem sérfræðiþjónustu, sem þetta svo sannarlega er.“ segir Anna Fríða og skellir upp úr. Er verkefnið unnið í samstarfi við Giggó sem auglýsir einnig á sínum miðlum.
Þarf að hafa einhverja sérstaka eiginleika til að verða smakkari hjá Nóa Siríus? „Nei við viljum sjá fjölbreyttan hóp smakkara“ segir Anna Fríða og bendir á að þau spyrja um aldur umsækjenda til þess að ganga úr skugga um að þau fái til sín fólk á öllum aldri.
„Viðskiptavinir okkar eru úr öllum aldurshópum, og þess vegna er mikilvægt að fá þverskurð af samfélaginu - við viljum auðvitað bjóða upp á eitthvað sem heillar sem allra flesta“ segir Anna Fríða og bætir við að þeim sé annt um að hlusta á viðskiptavini sína og fá reglulega endurgjöf frá þeim.
„Nói Siríus er yfir 100 ára gamalt fyrirtæki og hefur vaxið og dafnað mikið á þessum tíma. Það var því skemmtilegt að geta leitað til viðskiptavina okkar og þannig haldið áfram að bjóða upp á spennandi úrval af gæðasælgæti.“
Miða við höfðatölu mætti jafnvel halda því fram að Ísland ætti hvað flesta sælgætissérfræðinga í heimi, ef dæma má af fjölda umsækjenda.
„Við erum í skýjunum með viðbrögðin, en hundruðir hafa boðið fram krafta sína og sérfræðikunnáttu í sælgætissmakki - það verður ótrúlega gaman og gómsætt að fylgja þessu eftir“ segir Anna Fríða.
Hægt er að sækja um að verða smakkari hjá Nóa Siríus hér.
