Jólaherferð og hátíðarkveðjur frá ritstýrum

Við viljum óska tryggum lesendum og vinum Herferðar óskir um gleði og frið um hátíðarnar og um leið þakka fyrir ævintýralegar viðtökur á þeim tæpum þrem mánuðum sem Herferð hefur verið í loftinu.

‍

Hugmyndin að Herferð kviknaði í vor og leit miðillinn dagsins ljós þann 1. október á árinu undir stjórn okkar vinkvennanna, Önnu Margrétar og Ernu Hreins.

‍

Herferð er hugmynd sem við hlökkum mikið til að þróa og efla á nýju ári í samvinnu við áhugafólk um skapandi markaðsmál á Íslandi. Við erum afar stoltar af því að hafa skapað vettvang fyrir þá sem starfa innan bransans til að bæði sýna verk sín og að veita okkur innsýn inn í þeirra starf innan sviðsins.

‍

Það hefur sýnt sig á undanförnum vikum að það er gríðarlegur áhugi fyrir því að bæði miðla og fræðast um það frábæra starf sem markaðsfólk á Íslandi vinnur. Við trúum því að því meira sem við deilum, því meira lærum við og því meira eflum við markaðs- og auglýsingastarf á Íslandi og stuðlum að fagmannlegu samfélagi innan stéttarinnar.

‍

Jákvæðar undirtektir hafa ekki látið á sér standa og getum við lofað ykkur farsælu framhaldi um ókomna tíð. Línan er alltaf opin og tökum við vel á móti öllum hugmyndum og efni sem þið kunnið að luma á.

‍

Með hátíðarkveðju,

Anna og Erna

‍